बुटवल। राष्ट्रिय प्रजातन्त्र पार्टी (राप्रपा) रुपन्देहीमा ठूलो हलचल भएको छ। पार्टीका उपाध्यक्ष अजयकुमार गुप्तासहित तीन जनाले पार्टी परित्यागको घोषणा गरेका छन्।
मंगलबार आयोजित पत्रकार सम्मेलनमा उपाध्यक्ष अजयकुमार गुप्ता, जिल्ला सल्लाहकार तथा गत स्थानीय तह निर्वाचनमा सिद्धार्थनगर नगरपालिकाकी उपप्रमुखकी उम्मेदवार विनिता गुप्ता र रुपन्देही क्षेत्र नं ३ का क्षेत्रीय उपाध्यक्ष डा. अमित चर्तुवेदीले पार्टी छाडेको जानकारी गराएका हुन्।
उनीहरुद्वारा जारी गरिएको संयुक्त विज्ञप्तिमा भनिएको छ, ‘उपरोक्त सम्बन्धमा राप्रपा रुपन्देहीको सक्रिय कार्यंकर्ताको रुपमा विभिन्न ओहोदामा काम गर्दै आइरहेका हामी आजको मितिदेखि यस पार्टीको साधारण सदस्य समेत नरहने गरी पार्टी परित्याग गरेको जानकारी गराउँदछौँ । आजका मितिसम्म हामीलाई सहयोग गर्ने पार्टीका सम्पूर्ण नेता कार्यकर्तालाई हृदयदेखि धन्यवाद ज्ञापन गर्दछौँ ।’
यद्यपि, उनीहरुले पार्टी परित्याग गर्नुको खास कारण खुलाएका छैनन्। तर, गत निर्वाचनमा रुपन्देही क्षेत्र नं ३ बाट निर्वाचित सांसद दिपक बोहराको निधनपछि हुन लागेको उपनिर्वाचनमा टिकट नपाउने भएपछि उनीहरुले पार्टी छाडेको हुनसक्ने अनुमान गरिएको छ। उक्त निर्वाचन क्षेत्रमा उपनिर्वाचनका लागि अन्य आकांक्षीहरु पनि देखिएका छन्।
