हेटौंडा,साउन ३०। हेटौडा उपमहानगरपालिका वडा नं. १३ स्थित पदमपोखरीको पिपल बोट विकास संस्थामा भूमिहीन सुकुम्बासी तथा अव्यवस्थित बस्तीहरूको अधिकार सुनिश्चित गर्न माग गर्दै हस्ताक्षर अभियान तीव्र रूपमा चलिरहेको छ।
“मध्यवर्ती क्षेत्र खारेज गरौं, सम्पूर्ण उपभोक्तालाई सहभागी बनाऔं, भूमिहीन सुकुम्बासी तथा अव्यवस्थित बसोबास बस्ती एक रहौं” भन्ने नारासहित जारी यो अभियानमा हालसम्म ६०० भन्दा बढी स्थानीयहरूको उत्साहजनक सहभागिता देखिएको छ। अभियानको आयोजना भूमिहीन सुकुम्बासी अव्यवस्थित बस्ती संघर्ष समितिले गरेको हो।
संघर्ष समितिका सह-संयोजक उत्तम गोम्जाका अनुसार वडा नं. १३ अन्तर्गतका ८ वटा टोल विकास संस्थाहरू – पदमा सम्भव, पिपल बोट, जडिबुटी, बिन्दाबासिनी, नमुना, सहारा, वनस्पति र हिमचुली — मार्फत अभियानलाई थप सशक्त बनाइँदैछ।
यसैगरी, मनहरी गाउँपालिका अन्तर्गत पनि यो अभियान विस्तार गरिएको छ। संघर्ष समितिका अध्यक्ष क्षेत्रबहादुर मुक्तानका अनुसार मनहरी गाउँपालिकाको वडा नं. ३, ४, ५, ६ र ७ मा हस्ताक्षर संकलन भइसकेको छ। ४ र ५ नं. वडामा हिजो सम्पन्न हस्ताक्षर कार्यक्रममा हजारभन्दा बढी व्यक्तिको सहभागिता देखिएको थियो भने अहिले ६ र ७ नं. वडामा पनि हजारौं व्यक्तिहरूले आफ्नो समर्थन हस्ताक्षरमार्फत जनाइरहेका छन्।
संघर्ष समितिले यो अभियानलाई आगामी दिनमा अन्य वडाहरूमा समेत विस्तार गर्दै लैजाने योजना बनाएको जनाएको छ।
