काठमाडौं, भदौ ३० गते । काठमाडौँ नयाँ बानेश्वरस्थित संसद् भवन संघीय अन्तर्राष्ट्रिय सम्मेलन केन्द्रमा भदौ २४ गते भएको आगजनी, तोडफोड तथा लुटपाटपछि संघीय संसद सचिवालयले हराएका मालसामान फिर्ता गर्न सार्वजनिक आह्वान गरेको छ।
सचिवालयको स्थलगत निरीक्षण र प्राप्त विभिन्न सूचनाअनुसार टेबुल, कुर्सी, कम्प्युटर, प्रिन्टर, स्क्यानर, टेलिभिजन, मोनिटर, माइक, मिक्सर, स्पिकर, फोटोकपी मेसिनसहितका विद्युतीय उपकरणहरू अनधिकृत व्यक्तिहरूले लगेको पुष्टि भएको छ।
सचिवालयले ती मालसामान जो–कोही व्यक्तिसँग भए तत्काल फिर्ता गरिदिन र ती सामग्री जहाँ रहेका छन् वा जसले लगेको हो भन्ने जानकारी भएमा सूचना दिन आग्रह गरेको छ। साथै, घटनासम्बन्धी भिडियो उपलब्ध गराएमा सहयोग हुने बताइएको छ।
सचिवालयले भिडियो वा जानकारी दिने व्यक्तिको परिचय पूर्ण रूपमा गोप्य राखिने पनि स्पष्ट गरेको छ।
सम्पर्कका लागि शाखा अधिकृत सुनिल सुवाल (फोन: ०१४२००१०२ / ९८४१११८७६) र कम्प्युटर अपरेटर दीपेन्द्र विश्वकर्मा (फोन: ०१४२००१०२ / ९८५५०६९१६३) लाई सम्पर्क गर्न सकिने व्यवस्था गरिएको छ।
उपसचिव अधि राज राईको हस्ताक्षरमा जारी सूचनामा घटनामा संलग्न वा देखेका व्यक्तिहरूले सत्य जानकारी उपलब्ध गराई सहयोग गर्न हार्दिक आह्वान गरिएको छ।
