मनहरी, भदौ ३० गते । मनहरी गाउँपालिका–२ ट्याङ्की दमारस्थित श्री ट्याङ्की दमार प्रारम्भिक बाल विकास केन्द्रका बालबालिकालाई पत्रकार तथा विशेष पोस्ट डट कमका सञ्चालक सन्देश थिङले आफ्नो जन्मदिनको अवसर पारेर कपी, कलम, इलेजरलगायत शैक्षिक सामग्री वितरण गरेका छन्।
भदौ २८ गते परेको आफ्नो जन्मदिनलाई अर्थपूर्ण बनाउन उनले अध्ययनरत साना भाइबहिनीहरूलाई आवश्यक पर्ने सामग्री सहयोग गरेका हुन्। कार्यक्रममा बोल्दै थिङले “सकेसम्म जन्मदिनलाई सामाजिक सेवामुखी कार्यमार्फत आत्मसन्तुष्टि दिलाउने प्रयास गर्दै आएको छु, आगामी दिनमा पनि यस्ता काम निरन्तर गर्नेछु” भन्ने धारणा राखेका छन् ।
कार्यक्रममा थिङका साथी स्तर तामाङले समेत संलग्न हुँदै यस कदमलाई प्रशंसनीय भन्दै निरन्तर साथ र सहकार्य गर्ने प्रतिबद्धता जनाएका छन्। आजको कार्यक्रमलाई सञ्चालन भने पत्रकार सूर्य सीले गरेका थिए।
त्यसैगरी आज नै उनले त्यसै वडाकी ९८ वर्षीया छोरी माया स्याङतानलाई चामल, दाल, तेल, आलु, नुन, लुगाधुनी साबुन, भाँडा मस्काउने साबुन, चाउचाउ, भुजा, बिस्कुट लगायत खाद्यान्न तथा आवश्यक पर्ने सामग्री सहयोग गरेका छन्। हाल स्याङतानलाई उनका १८ वर्षीय नाति बुद्धिमान स्याङतानले स्याहार–सुसार गरिरहेका छन्। उनले स्थानीय सरकारको सहयोग अपुग भए पनि मानवीयताको भावले गरिएको यो सहयोगले ठूलो राहत पुगेको बताए्का छन्।
पत्रकारितासँगै सामाजिक उत्तरदायित्व बोध गर्दै थिङले विगतमा पनि आफ्नो जन्मदिन अवसरमा शैक्षिक सामग्री तथा ब्याग वितरण गरेको उल्लेख गर्दै आगामी दिनमा पनि यस्ता सेवामुखी कार्यलाई निरन्तरता दिने बताएका छन्।
