हेटौँडा, अशोज २ गते । बागमती प्रदेशका मुख्यमन्त्री तथा नेपाली कांग्रेस संसदीय दलका नेता इन्द्रबहादुर बानियाँको अध्यक्षतामा बसेको सर्वदलीय बैठकले संविधान दिवस भव्यरूपमा मनाउने निर्णय गरेको छ ।
बैठकले भदौ २३ र २४ गतेको जेन–जि अभियानका क्रममा ज्यान गुमाएका नागरिकप्रति श्रद्धाञ्जलि अर्पण गर्दै परिवारजनप्रति समवेदना प्रकट गरेको छ । साथै घाइतेहरुको शीघ्र स्वास्थ्यलाभको कामना गरिएको छ ।
सर्वदलीय बैठकले आन्दोलनका क्रममा प्रदेश सरकारअन्तर्गतका संरचना, स्थानीय तहका कार्यालय तथा विभिन्न व्यवसायिक प्रतिष्ठानमा भएको क्षतिको विवरण संकलन गर्ने निर्णय गरेको छ ।
त्यसैगरी, सुशासन र खर्च कटौतीका विषयमा प्रभावकारी कार्यक्रम ल्याई अघि बढाउने र प्रदेशसभाको बैठक छिट्टै सञ्चालन गर्ने सहमति पनि बैठकले जनाएको छ ।
बैठकमा एमाले संसदीय दलका नेता जेएन थपलिया, माओवादी संसदीय दलका नेता शालिकराम जमकट्टेल, नेकपा (एकीकृत समाजवादी) संसदीय दलका नेता कृष्णप्रसाद शर्मा खनाल, माओवादी संसदीय दलका प्रमुख सचेतक रत्न ढकाल, कृषि तथा पशुपन्छी विकास मन्त्री मधुसुदन पौडेललगायतको उपस्थिति थियो ।
