काठमाडौं, अशोज २७ गते । गाजाको युद्धभूमिमा नेपाली युवा विपिन छुटेका खबरसँगै सामाजिक सञ्जालमा आक्रोश फैलिएको छ। यस्तै सन्दर्भमा “हर्क साम्पाङ A Revolution ID” नामक सामाजिक सञ्जाल खाताबाट एउटा भावनात्मक भनाइ सार्वजनिक भएको छ—
“नेपालका लाखौं युवाहरू रोजगारी र भविष्यको खोजीमा विदेशिएका छन्। तर ती मध्ये कति जना सुरक्षित छन्, र कति जना भेडा–बाख्राझैं अपमान र कठोर श्रम सहँदै सडिरहेका छन् भन्ने प्रश्न अनुत्तरित छ।”
पोस्टमा वैदेशिक रोजगारमा जाने नेपालीहरूको अवस्थाप्रति गम्भीर चिन्ता व्यक्त गर्दै भनिएको छ कि—सरकार तथ्यांकमा मात्रै सीमित भएको छ, तर ती तथ्यांकभित्र लुकेका “पीडा, आँसु र रगतका कथा” को कुनै हिसाब छैन।
हरेक वर्ष सयौँ नेपाली युवाहरू विदेशमै अकालमै ज्यान गुमाउँछन्—कोही काम गर्ने क्रममा दुर्घटनामा, कोही आत्महत्यामा, त कोही उपचार नपाएर। शव स्वदेश फर्किन हप्तौँ लाग्ने र परिवारहरू वर्षौँसम्म न्याय र क्षतिपूर्तिको प्रतिक्षामा बस्ने अवस्था अझै पनि दोहोरिँदो छ।
पोस्टको अन्त्यमा भनिएको छ—
“अब सरकारले आँकडा मात्र होइन, साँचो तथ्य सार्वजनिक गर्नुपर्छ—कति नेपाली विदेशमा मरे, कति दुर्व्यवहारको सिकार भए, र कति घर फर्किन नपाई सडिरहेका छन्। यो केवल संख्याको कुरा होइन, राष्ट्रका सपनाको कुरा हो।”
सामाजिक सञ्जालमा उक्त भनाइले देशभक्त युवाहरूमा ठूलो प्रतिक्रिया पैदा गरेको छ। धेरैले सरकारसँग वैदेशिक रोजगार नीतिमा पारदर्शिता र श्रमिकको सुरक्षाका लागि ठोस कदम चाल्न माग गरेका छन्।
