भक्तपुर, कात्तिक ११ गते । नेपाल प्रहरीका महानिरीक्षक (आईजीपी) चन्द्र कुबेर खापुङ्गले मंगलबार भक्तपुरको नगरकोटस्थित प्रहरी प्रभागको नवनिर्मित भवनको औपचारिक रूपमा उद्घाटन गरेको छ।
उद्घाटन कार्यक्रममा आईजीपी खापुङ्गले भवन निर्माणमा सहयोग पुर्याउने विभिन्न महानुभावहरूलाई प्रशंसापत्र प्रदान गरेका छन्। सो अवसरमा उनले भवनको अवलोकन गर्दै कार्यालय परिसरमा वृक्षारोपण समेत गरेका थिए।
महानिरीक्षक खापुङ्गले नवनिर्मित भवन केवल भौतिक संरचना नभई आम नागरिकको प्रहरी प्रतिको विश्वास र अपेक्षाको प्रतीक रहेको बताएका छन्। उनले भवनले प्रहरी सेवालाई अझ प्रभावकारी, पारदर्शी र जनमुखी बनाउने विश्वास व्यक्त गर्दै प्रहरी र नागरिक बीचको सम्बन्धलाई थप सुमधुर र सुदृढ बनाउनेमा आशा व्यक्त गरेका छन् ।
“नेपाल प्रहरी कानून कार्यान्वयनका साथै समाजमा घट्ने विपत्ति, दुर्घटना र असामान्य अवस्थाहरूमा सधैं अग्रपंक्तिमा रही सेवा प्रवाह गर्दै आएको संस्था प्रति जनताको आस्था उच्च छ,” आईजीपी खापुङ्गले भने, “यो भरोसालाई कायम राख्न सबै प्रहरी कर्मचारीले शिष्ट आचरण र जिम्मेवार कार्यशैली अपनाउन जरुरी छ।”
कार्यक्रममा काठमाडौं उपत्यका प्रहरी कार्यालयका प्रमुख प्रहरी अतिरिक्त महानिरीक्षक दान बहादुर कार्कीले धन्यवाद मन्तव्य दिेएको छ । सो अवसरमा चाँगुनारायण नगरपालिकाका प्रमुख जीवन खत्री र भक्तपुरका प्रमुख जिल्ला अधिकारी नमराज घिमिरेले पनि शुभकामना मन्तव्य व्यक्त गरेका छन् ।
जिल्ला प्रहरी परिसर भक्तपुरका प्रमुख प्रहरी उपरीक्षक सूर्य बहादुर खड्काले स्वागत मन्तव्य दिएको कार्यक्रममा प्राविधिक प्रहरी नायव उपरीक्षक केविन जंग थापाले भवन निर्माण सम्बन्धी प्रतिवेदन प्रस्तुत गरेका थिए। नेपाल सरकारको नियमित बजेटबाट कुल ४ करोड ४६ लाख १८ हजार १ सय ९७ रुपैयाँ २२ पैसाको लागतमा भवन निर्माण कार्य सम्पन्न भएको हो।
उद्घाटन समारोहमा नेपाली सेनाका उपरथी, प्रहरी नायव महानिरीक्षक, वरिष्ठ प्रहरी अधिकृत, जिल्लास्थित सुरक्षा निकायका प्रमुख, सरकारी कार्यालयका प्रतिनिधि, विभिन्न राजनीतिक दलका प्रतिनिधि, संघ–संस्थाका प्रमुख, स्थानीय समाजसेवी, सञ्चारकर्मी तथा स्थानीय बासिन्दाहरूको उल्लेखनीय उपस्थिति रहेको थियो।
