हेटौडा, कात्तिक १७ गते । नेपाल कम्युनिस्ट पार्टी (नेकपा) का केन्द्रीय सदस्य तथा जिल्ला इन्चार्ज रामसीले माओवादी केन्द्र र प्रचण्ड नेतृत्वको हालको एकतालाई ‘विचार र उद्देश्यविहिन’ भन्दै आलोचना गरेका छन्। उनले फेसबुकमार्फत जारी एक स्टाटसमा प्रचण्डले माओवादी विचारधारा र संघर्षको लाइन छोडेको दाबी गर्दै यस्तो एकताले अन्ततः जनताको पक्षमा होइन, दुश्मनको पक्षमा आत्मसमर्पण गर्नुपर्ने अवस्था ल्याउने चेतावनी दिएका छन्।
रामसीले लेखेका छन्, “पार्टीको नामबिनाको एकता र चुनाव चिन्हको एकता मात्रले के अर्थ राख्छ? माओवादी विचार, नीति र नेतृत्व बिना गरिएको एकता शक्तिहीन हुन्छ।”
उनका अनुसार, हालको माओवादी केन्द्रभित्रको निर्णय धेरै इमानदार र सच्चा कार्यकर्ताहरूले मन नपराएको र बाध्य भएर स्वीकृति दिएको जस्तो देखिएको छ। उनले प्रचण्डको ‘फुटाउ र राज गर’ नीतिले पार्टीभित्र पहिरो सुरु भएको समेत उल्लेख गरेका छन्।
रामसीले क्रान्तिकारी विचार, नीति र पुस्तान्तरणसहितको सहकार्य बिना बाम एकता निष्प्रभावी हुने दाबी गर्दै भनेका छन्, “नेकपा, माओवादी केन्द्र, एकीकृत समाजवादी, एमाले, नेसपा, क्रान्तिकारी कम्युनिस्ट पार्टी र नेकपा बहुमतबीच विचारगत एकता र सहकार्य नै आजको आवश्यकता हो।”
उनले प्रचण्ड–माधव नेतृत्वलाई जनताले अस्वीकार गरिसकेको भन्दै अबको राजनीतिक यात्रामा सच्चा क्रान्तिकारी र क्षमतावान नेतृत्वको रूपमा नेकपा विप्लव सी नै कम्युनिस्ट आदर्श बन्ने दाबी गरे।
रामसीले अन्त्यमा भनेका छन्, “क्रान्तिकारी विचार, नीति र नेतृत्वले मात्र आन्दोलनको रक्षा र देशको समाधान दिन सक्छ; गलत बाटोमा लाग्दा प्राप्त उपलब्धिहरू गुम्ने खतरा हुन्छ।”
