काठमाडौं, मंसिर १० गते । देश गम्भीर राजनीतिक अनिश्चिततामा फसेको दाबी गर्दै जेन जि पुस्ताका अगुवा रवि किरण हमालले सर्वपक्षीय सरकार गठन र संविधान पुनर्लेखनलाई अहिलेको मुख्य राजनीतिक समाधानका रूपमा अघि सारेका छन्। बीपी चिन्तन प्रतिष्ठानले आयोजना गरेको कार्यक्रममा बोल्दै उनले अहिलेको सत्ता समायोजन “कु प्रकृयाको परिणाम” भएको आरोप लगाए।
किरणका अनुसार अस्थिरता, अविश्वास र शासकीय अक्षमता बढ्दै जाँदा युवापुस्ताले भाद्र २३–२४ मा उठाएको विद्रोहलाई सत्ता पक्षले बुझ्ने कि नबुझेर झनै भड्काउने भन्ने प्रश्न अहिले निर्णायक बनेको छ। “विद्रोहलाई कमजोर पार्ने, अपमानजनक तरिकाले लत्याउने कुनै पनि प्रयास युवापुस्ताले सहनेछैन,” उनले चेतावनी दिए।
सुशीला कार्की र ओमप्रकाश अर्याल नेतृत्वको समूहले “राज्यविहिनताको वातावरण उपयोग गर्दै सत्ता कब्जा गरेको” किरणको आरोप थियो। उनले पछिल्ला केही सरकारी निर्णयलाई उदाहरणका रूपमा प्रस्तुत गर्दै भ्रष्टाचार र व्यक्तिगत स्वार्थको साम्राज्य फेरि बलियो बन्दै गएको टिप्पणी गरे। प्रस्तुत गरेका उदाहरणमध्ये—
१) डोल्मालाई अर्थमन्त्रीमार्फत दिइएको कर छुट,
२) ऊर्जामन्त्री कुलमान घिसिङद्वारा ४३ करोड घाटा हुने विद्युत् सम्झौता,
३) १६–१७ वर्षका किशोरीलाई बेहोस बनाएर डिम्ब बिक्री गराउने गिरोहलाई महान्यायाधिवक्तिबाट उन्मुक्ति,
४) गृहमन्त्रीले आफ्नै काकालाई डीआइजी बनाउन दरबन्दी थपेको घटना,
५) प्रधानमन्त्रीका सोकीय सचिवले आफन्त र नजिकका व्यक्तिलाई दिएको राजनीतिक नियुक्ति—
यी सबैलाई उनले “लुटतन्त्रको संस्थागत रूप” का प्रमाणअनुसार देखाए। किरणले विद्यमान राजनीतिक दलका ईमानदार तथा सुधारवादी नेताहरू, जेन जि पुस्ता र असन्तुष्ट जनसमुदायलाई एउटै मोर्चामा उभ्याउँदै सर्वपक्षीय सरकार गठन गरेर संविधान पुनर्लेखनमा प्रवेश गर्न अब ढिलो हुन नहुने निष्कर्ष प्रस्तुत गरे।
