हेटौंडा, मंसिर १८ गते । सडक डिभिजन कार्यालय हेटौडाले २५–२५ गज सडक विस्तारको तयारीसँगै प्रभावित हुने व्यावसायीलाई वैकल्पिक रूपमा व्यवस्थापन गर्न सकिने हेटौंडा उपमहानगरपालिकाले जनाएको छ। सडक विस्तारको कारण बिस्थापित बन्ने व्यावसायीलाई स्थानान्तरणका लागि उपमहानगरले विभिन्न संरचना पहिचान गरेको हो।
उपमहानगरका अनुसार हेटौंडा बसपार्कस्थित ४० वटा सटर तत्काल प्रयोगमा ल्याउन सकिनेछन्। यस्तै, हेटौंडा–११ स्थित तरकारी, फलफूल तथा थोक बजारका लागि निर्माण गरिएका ६० वटा कोठामा पनि प्रभावित व्यवसायीलाई राख्न सकिने व्यवस्था मिलाइएको छ।
साथै भुटनदेवी माध्यमिक विद्यालयले निर्माण गरेका खाली सटरहरू पनि वैकल्पिक स्थानका रूपमा प्रयोग गर्न सकिने उपमहानगरपालिकाका स्रोतले बताएका छन्। उपमहानगरका अनुसार सडक विस्तारले व्यवसाय प्रभावित नहोस् भन्ने उद्देश्यले वैकल्पिक स्थल व्यवस्थापन तत्कालीन प्राथमिकतामा राखिएको छ।
