हेटौंडा, मंसिर १८ गते । सडक डिभिजन कार्यालय हेटौडाले अघि बढाएको २५–२५ गज सडक विस्तारका क्रममा उत्पन्न हुन सक्ने अवरोध र सुरक्षा व्यवस्थाबारे प्रमुख जिल्ला अधिकारी (सिडिओ) बसन्त अधिकारीले स्पष्ट धारणा व्यक्त गरेका छन्। पत्रकारहरूसँग कुरा गर्दै उनले स्थानीय प्रशासनले कानूनले परिभाषित सीमा भित्र रहेर मात्र कदम चाल्ने बताए।
सिडिओ अधिकारीले भने, “अश्रुग्यास, लाठी प्रहार स्थानीय प्रशासन ऐनअनुसार मात्र प्रयोग हुन्छ। आवश्यक नपरेको खण्डमा कुनै पनि अप्रिय अवस्था नआओस् भन्ने हाम्रो चाहना हो।”
उनका अनुसार सडक विस्तार कार्यलाई अवरुद्ध गर्ने, उत्तेजना फैलाउने वा गैरकानुनी गतिविधि गर्ने व्यक्तिहरूलाई कानुनअनुसार कडाइका साथ कारबाही गरिनेछ।
सडक विस्तारलाई लिएर प्रभावित व्यवसायी तथा स्थानीयवासीले विभिन्न चिन्ता र असन्तुष्टि व्यक्त गर्दै आएका छन्। यद्यपि प्रशासनले समन्वय, संवाद र कानुनी प्रक्रियामार्फत समस्या समाधान गर्दै सडक विस्तारलाई व्यवस्थित रूपमा अगाडि बढाइने स्पष्ट संकेत दिएको छ।
