हेटौंडा, पुस ९ गते । हेटौंडा उपमहानगरपालिका–१३ मा रहेको श्री कालिका आधारभूत विद्यालयमा ४३औँ अभिभावक भेला तथा विद्यालय व्यवस्थापन समिति पुनर्गठन सम्पन्न भएको छ।
बुधबार आयोजित कार्यक्रममा विद्यालय व्यवस्थापन समिति अध्यक्ष सङ्गीता वाइबाको अध्यक्षता र वडा नम्बर १३ का वडा अध्यक्ष पेम्बा लामाको प्रमुख आतिथ्यतामा कार्यक्रम सम्पन्न भएको हो। भेलाबाट अध्यक्ष वाइबाको नेतृत्वमा सात सदस्यीय नयाँ विद्यालय व्यवस्थापन समिति सर्वसम्मत रूपमा चयन गरिएको छ।
कार्यक्रममा विद्यालयको शैक्षिक अवस्था, भौतिक पूर्वाधार, शैक्षिक गुणस्तर सुधारका प्रयास तथा अभिभावक–विद्यालय सहकार्यका विषयमा प्रधानाध्यापक रामकृष्ण न्यौपानेले प्रतिवेदन प्रस्तुत गर्नुभयो। उहाँका अनुसार आर्थिक वर्ष २०८१/८२ को तथ्याङ्कअनुसार विद्यालयमा हाल २३८ जना विद्यार्थी अध्ययनरत छन्।
प्रतिवेदनमा ११ प्रतिशत विद्यार्थी विद्यालय बाहिर रहेको, केवल ५ प्रतिशत विद्यार्थी मात्र नियमित रूपमा उपस्थित हुने तथा १० प्रतिशत विद्यार्थीले परीक्षा नदिएको तथ्याङ्क उल्लेख गरिएको छ। प्रधानाध्यापक न्यौपानेले अभिभावकको संरक्षण नहुनु, जानकारी नदिई बोर्डिङ विद्यालयतर्फ जाने प्रवृत्ति र बीचमै विद्यालय छोड्ने समस्या चुनौतीका रूपमा देखिएको जानकारी दिए।
पुनः पदभार ग्रहण गरेपछि अध्यक्ष वाइबाले केही विद्यार्थी आफन्तको घरमा बसेर अध्ययन गर्दा पढाइ छुट्ने, कमजोर आर्थिक अवस्था तथा रोजगारीको खोजीमा विद्यालय छोड्ने समस्या रहेको बताएको छ। उनले आगामी दिनमा अभिभावक, समुदाय र सरोकारवालासँग सहकार्य गर्दै यस्ता समस्याको समाधान गरी विद्यालयको शैक्षिक अवस्था सुधारमा सक्रिय भूमिका खेल्ने प्रतिबद्धता व्यक्त गरेका छन्।
