काठमाडौँ, फागुन ४ गते । राजनीतिक विश्लेषक बुद्धछिरिङ मोक्तानले वर्तमान राजनीतिक दलहरूको चुनावी घोषणापत्र र प्रतिवद्धतामाथि गम्भीर प्रश्न उठाएका छन्। सामाजिक सञ्जाल फेसबुक मार्फत सार्वजनिक गरेको स्टाटसमा उनले राजनीतिक दललाई फास्टफुड स्टलसँग तुलना गर्दै राज्य–निर्माणको मूल प्रश्न ओझेलमा परेको टिप्पणी गरेका हुन्।
मोक्तानले लेखेका छन्—राजनीतिक दल फास्टफुड स्टल होइनन्, जहाँ एक भोटको बदलामा के–के पाइन्छ भन्ने हिसाबले राजनीति गरिन्छ। उनका अनुसार राजनीतिक दलहरूको सबैभन्दा ठूलो दायित्व ‘राजनीति’ र ‘अर्थतन्त्र’को सन्तुलन हो, जसलाई उनले “राजनीतिक–अर्थशास्त्र”को संज्ञा दिएका छन्।
उनले राजनीतिक आधार नै कमजोर भएको अवस्थामा ‘केक, कोक, पिज्जा र बर्गर’ जस्ता लोकप्रिय नाराले अर्थतन्त्र चल्न नसक्ने तर्क गरेका छन्। साथै, “राजनीति ठिक गर्ने जिम्मा TOB समूहको हो?” भन्ने प्रश्न गर्दै उनले राजनीतिक नेतृत्वको भूमिकामाथि व्यंग्य गरेका छन्।
मोक्तानले अन्त्यमा स्पष्ट प्रश्न उठाएका छन्— हामी फास्टफुड स्टलको राजनीति गर्ने कि राज्य–निर्माणको राजनीति? उनका अनुसार यदि राज्यको अस्तित्व नै भूराजनितिक दबाबका कारण कमजोर बन्दै गएको छ भने, सर्वप्रथम त्यसलाई सुदृढ बनाउनु अपरिहार्य छ।
