काठमाडौँ, चैत १ गते । युवाहरूलाई सामाजिक मुद्दाहरूमा गहन छलफल र नेतृत्व विकास गराउने उद्देश्यले काठमाडौँको क्रिस्टल होटलमा आजदेखि ‘युथ लर्निङ ल्याब फेलोसिप’ कार्यक्रम सुरु भएको छ।
युवालयको आयोजना तथा प्लान इन्टरनेसनल नेपालको सह-आयोजनामा सुरु भएको यो फेलोसिप आजदेखि तीन दिनसम्म सञ्चालन हुनेछ। विशेषगरी प्लस टु र स्नातक तहका विद्यार्थीहरूलाई लक्षित गरिएको यस कार्यक्रममा सातै प्रदेशबाट १५ जना युवाहरूको समावेशी सहभागिता रहेको छ।
परम्परागत पाठ्यक्रमभन्दा बाहिर गएर युवाहरूलाई सामाजिक विषयवस्तु माथि छलफल गराउने र निष्कर्षमा पुर्याउने वातावरण सिर्जना गर्नु यस कार्यक्रमको मुख्य ध्येय हो। तीन दिनको सघन सत्रपछि सहभागी युवाहरूले आफ्ना कार्यक्रमहरूको योजना बनाउने र त्यसको कार्यान्वयन गर्ने जिम्मेवारी लिनेछन्।
यस प्रक्रियामा आयोजक संस्थाले उनीहरूलाई सल्लाह र निगरानीको भूमिकामा रहेर आवश्यक सहयोग पुर्याउने जानकारी गराएको छ।सहभागी युवाहरूलाई आ-आफ्नो भूमिका र जिम्मेवारी आफैँ निर्धारण गरी कार्यक्रमहरू सञ्चालन गर्न प्रोत्साहित गरिनेछ। यस फेलोसिपले युवाहरूलाई सिकाउनेभन्दा पनि उनीहरू स्वयंले छलफल गरी निष्कर्ष निकाल्न र नेतृत्व विकास गर्न मद्दत पुग्ने विश्वास लिइएको छ।
कार्यक्रमको माध्यमबाट युवा केन्द्रित एवं युवाद्वारा नै नेतृत्व गरिने संस्थाहरूको विकासमा टेवा पुग्ने आयोजकको भनाइ छ।
