मनहरी, चैत १० गते । मकवानपुरको मनहरी गाउँपालिकाबाट ठूलो परिमाणमा लागूऔषध गाँजा बरामद गरिएको छ। इलाका प्रहरी कार्यालय मनहरीबाट खटिएको प्रहरी टोलीले १७१ किलो २१ ग्राम गाँजासहित एक जनालाई पक्राउ गरेको हो।
प्रहरीका अनुसार बिहान करिब ६:१० बजे मनहरी गाउँपालिका वडा नं. ९ क्षेत्रमा आउँदै गरेको बा.१३ च २१४ नम्बरको हात्ती गाडीलाई शंकाको आधारमा रोकि जाँच गरिएको थियो। जाँचका क्रममा गाडीको पछाडि लोड गरी ल्याइएको अवस्थामा उक्त परिमाणको गाँजा फेला परेको प्रहरीले जनाएको छ।
गाँजासहित पक्राउ पर्नेमा मकवानपुरको राक्सीराङ गाउँपालिका वडा नं. ४ निवासी २० वर्षीय अक्कल प्रसाद स्याङतान रहेका छन्। प्रहरीले गाँजा र गाडी दुवैलाई नियन्त्रणमा लिएको छ।
पक्राउ परेका स्याङतानलाई मकवानपुर जिल्ला अदालत हेटौडाबाट लागूऔषध सम्बन्धी कसुरमा म्याद थप गरी थप अनुसन्धान कार्य अघि बढाइएको प्रहरीले जानकारी दिएको छ।
