मनहरी, चैत ११ गते । मकवानपुरको मनहरी गाउँपालिका अन्तर्गत विभिन्न स्थानहरूमा आज विद्युत सेवा अवरुद्ध हुने भएको छ। डि.ओ. सेट बदली तथा एच.टी. ब्रान्च स्वीच बदली गर्ने कार्यका कारण विद्युत आपूर्ति केही समयका लागि बन्द गर्न लागिएको हो।
मनहरी सब-स्टेसनबाट वितरण हुने ११ के.भि. मनहरी, रजैया र राक्सिराङ फिडर अन्तर्गतका सम्पूर्ण लाइनहरू आज बिहान ११:०० बजेदेखि बेलुका ५:०० बजेसम्म अवरुद्ध रहने जनाइएको छ।
विद्युत अवरुद्ध हुने क्षेत्रहरूमा सुनाचुरी, नयाँबस्ती, प्रतापपुर, रमनटार, मनहरी बजार तथा राक्सिराङ गाउँपालिका अन्तर्गतका सम्पूर्ण स्थानहरू पर्दछन्। साथै सिमपानी, ज्यामिरे, जैसिङ हुँदै दिल्लिपुर र बसन्तपुर लगायतका क्षेत्रमा पनि विद्युत सेवा प्रभावित हुने बताइएको छ।
सम्बन्धित निकायका अनुसार निर्धारित समयभन्दा अगाडि नै मर्मत कार्य सम्पन्न भएमा विद्युत सेवा चाँडै सञ्चालन गरिनेछ। यस अवधिमा हुन सक्ने असुविधाका लागि सेवाग्राहीसँग क्षमायाचना गर्दै आवश्यक तयारी गर्न आग्रह गरिएको छ।
