हेटौंडा, चैत १९ गते । माध्यमिक शिक्षा परीक्षा (एसईई) आजदेखि देशभर सुरु भएको छ। पहिलो दिन अनिवार्य अंग्रेजी विषयको परीक्षा शान्तिपूर्ण रूपमा सम्पन्न भएको छ।
परीक्षा तालिकाअनुसार चैत २० गते अनिवार्य नेपाली विषय तथा गैरनेपाली विद्यार्थीहरूका लागि ऐच्छिक अंग्रेजी (इलेक्टिभ इङलिस) को परीक्षा सञ्चालन हुनेछ। त्यस्तै चैत २२ गते अनिवार्य गणित, चैत २३ गते अनिवार्य विज्ञान तथा प्रविधि र संस्कृततर्फ शुक्लयजुर्वेद, सामवेद, अथर्ववेद, नीतिशास्त्र लगायत विषयहरूको परीक्षा हुनेछ।
यसैगरी चैत २४ गते अनिवार्य सामाजिक, चैत २५ गते ऐच्छिक प्रथम र चैत २६ गते ऐच्छिक द्वितीय विषयको परीक्षा सञ्चालन गरिनेछ।
यस वर्ष मकवानपुर जिल्लाबाट ७ हजार १९२ जना परीक्षार्थी एसईई परीक्षामा सहभागी भएका छन्। जिल्ला भरका १०५ वटा सामुदायिक तथा ३७ वटा संस्थागत विद्यालयका विद्यार्थीहरू परीक्षामा सहभागी भएका हुन्।
गत वर्षको तुलनामा यस वर्ष परीक्षार्थी संख्या घटेको देखिएको छ। अघिल्लो वर्ष मकवानपुरबाट ७ हजार ४५६ विद्यार्थी एसईई परीक्षामा सहभागी भएका थिए।
