हेटौँडा,चैत २९ गते । मकवानपुरको हेटौँडा उपमहानगरपालिका–१ चौकिटोलमा सञ्चालन भइरहेको अवैध घरेलु मदिरा भट्टीमा प्रहरीले छापा मारेको छ। विशेष सूचनाको आधारमा दिउँसो करिब ४ बजेको समयमा पुगेको प्रहरी टोलीले उक्त कारबाही गरेको हो।
प्रहरीका अनुसार जगत बहादुर घिसिङको जस्ताले बनेको घरमा सञ्चालन भइरहेको मदिरा उत्पादन स्थलमा खानतलासी गर्दा ठूलो मात्रामा मदिरा तथा कच्चा पदार्थ बरामद गरिएको छ। छापाका क्रममा करिब ४ हजार लिटर तयारी मदिरा र ५ हजार लिटर कच्चा पदार्थ बरामद गरिएको प्रहरीले जनाएको छ।
यससँगै प्रहरीले ८ वटा ग्यास सिलिन्डर, २ वटा भट्टी चुलो, २ बोरा चामल तथा मदिरा उत्पादनमा प्रयोग हुने प्लास्टिकका ड्रम र बोतलहरू पनि नियन्त्रणमा लिएको छ।
घटनामा संलग्न रहेको आरोपमा भट्टी सञ्चालक ६० वर्षीय जगत बहादुर घिसिङसहित ४ जनालाई प्रहरीले पक्राउ गरेको छ। पक्राउ पर्नेमा चितवन र बाराबाट आएका कामदारहरू समेत रहेका छन्।
यस घटनाबारे थप अनुसन्धान भइरहेको मकवानपुर प्रहरीले जनाएको छ।
