बकैया गाउँपालिका,बैशाख ६ गते । बकैया गाउँपालिका वडा नम्बर १ मा उज्यालो पार्टी नेपालले वडा स्तरमा संगठन विस्तार गरेको छ। आइतबार सम्पन्न कार्यक्रममार्फत काजीमान पाख्रिनको अध्यक्षतामा ११ सदस्यीय वडा कार्यसमिति चयन गरिएको हो।
नवगठित समितिमा स्थानीय कार्यकर्ताहरूको सक्रिय सहभागिता रहेको पार्टीले जनाएको छ। कार्यक्रम उज्यालो पार्टी नेपालका जिल्ला अध्यक्ष सुरेन्द्र लामाको प्रमुख आतिथ्यतामा सम्पन्न भएको थियो भने जिल्ला उपाध्यक्ष उत्तम गोम्जा विशेष अतिथिका रूपमा उपस्थित थिए।
कार्यक्रममा बोल्दै प्रमुख अतिथि लामाले पार्टी संगठनलाई तल्लो तहसम्म मजबुत बनाउने उद्देश्यले वडा स्तरमा संगठन विस्तारलाई तीव्रता दिइएको बताए। उनले नवगठित समितिलाई जनताको अपेक्षा अनुसार काम गर्न आग्रह गरे।
त्यसैगरी, जिल्ला उपाध्यक्ष गोम्जाले पार्टीप्रति जनविश्वास बढाउँदै संगठन सुदृढीकरणमा सक्रिय हुन नवसमितिलाई निर्देशन दिए।
यसअघि नै उज्यालो पार्टी नेपालले जिल्ला तहमा पनि नेतृत्व चयन गरिसकेको छ। पार्टीले उत्तम गोम्जालाई जिल्ला उपाध्यक्ष र अमिना घिसिङलाई जिल्ला सहसचिवको जिम्मेवारी प्रदान गरिसकेको जानकारी दिएको छ।
वडा स्तरमा संगठन विस्तारसँगै पार्टीले आगामी दिनमा आफ्नो गतिविधि अझ प्रभावकारी बनाउने विश्वास लिएको छ।
