हेटौडा, अशोज १ गते । यही भदौ २४ गते जेन-जी युवा आन्दोलनका क्रममा भएको तोडफोड र आगजनीका कारण हेटौडा उपमहानगरपालिकाका विभिन्न कार्यालयहरूमा व्यापक क्षति भएको छ। नगर प्रवक्ता तथा वडा नं. १ का वडाध्यक्ष सबिन न्यौपानेका अनुसार नगरपालिकाको राजस्व शाखा, न्यायिक समिति, योजना महाशाखा, सूचना प्रविधि शाखा र स्वास्थ्य शाखा पूर्णरूपमा जलेर नष्ट भएका छन्।
त्यस्तै, प्रमुख प्रशासकीय अधिकृत, प्रमुख तथा उपप्रमुखको कार्यकक्षमा समेत तोडफोड र आगजनी भएको छ। नगरपालिकाका करिब ११ वटा साना सवारी साधन, २४ वटा मोटरसाइकल तथा स्कुटर जलेर नष्ट भएका छन्। साथै, एक टिफर, एक जेसीबी र एक सवारी साधनमा क्षति पुगेको छ।
हेटौडा उपमहानगरपालिकाअन्तर्गतका वडा नं. ३, ४, ११,१५, १९ र ४ मा तोडफोड तथा आगजनी भएको छ भने वडा नं. १ र १३ को कक्षमा सामान्य क्षति पुगेको नगर प्रवक्ता न्यौपानेले जानकारी दिएको छ ।
“तल्लो तहको सरकार भनेको नागरिकसँग प्रत्यक्ष जोडिने सरकार हो। त्यसैले बिस्तारै सेवा प्रवाहलाई सुचारु गर्दैछौं,” न्यौपानेले भने। उनका अनुसार सरसफाइ, क्षतिको मुचुल्का तयार गर्ने र क्षतिग्रस्त कार्यकक्षहरूमा आवश्यक सामग्री जुटाउने काम भइरहेको छ।
नगरपालिकाले तोडफोड कम भएको वा नभएको वडामा भने सेवाप्रवाह सुचारु भइसकेको जनाएको छ।
