हेटौंडा, फागुन २५ गते । मोक्तान समाज नेपालद्वारा आयोजित मोक्तान परिवारको सामूहिक कुल पूजा कार्यक्रम एक दिने पूजापाठका साथ हेटौंडामा सम्पन्न भएको छ।
कार्यक्रममा मकवानपुरका विभिन्न स्थानबाट निमन्त्रणा स्वीकार गरी सहभागी भएका मोक्तान दाजुभाइहरूको उल्लेखनीय उपस्थिति रहेको आयोजकले जनाएको छ। पूजापाठ तथा धार्मिक विधिअनुसार सम्पन्न कार्यक्रममा सहभागी सम्पूर्ण मोक्तान परिवारप्रति आयोजकले हार्दिक नमन व्यक्त गर्दै पारिवारिक सुख, शान्ति र समृद्धिको शुभकामना व्यक्त गरेको छ।
कार्यक्रममा बोल्दै मोक्तान समाज नेपालका अध्यक्ष जीवन मान मोक्तान तामाङले धर्म, संस्कार, संस्कृति र पहिचानले नै समुदायको मौलिक चिनारी जोगाइराख्ने बताए। उनले यस्ता कार्यक्रमले समुदायबीच एकता, आपसी सम्बन्ध तथा सांस्कृतिक परम्पराको संरक्षणमा महत्वपूर्ण भूमिका खेल्ने विश्वास व्यक्त गरे।
हेटौंडामा आयोजित उक्त सामूहिक कुल पूजा कार्यक्रममा धार्मिक विधिअनुसार पूजापाठ सम्पन्न गर्नुका साथै सहभागीहरूबीच भेटघाट तथा शुभकामना आदान–प्रदान पनि गरिएको थियो। आयोजकका अनुसार समुदायको परम्परा, संस्कार र पहिचान संरक्षणका लागि आगामी दिनमा पनि यस्ता कार्यक्रमलाई निरन्तरता दिइनेछ।
