हेटौँडा, चैत ९ गते । सेवा, सहयोग र आवाजमा हामीका अध्यक्ष तथा सामाजिक अभियान्ता विशालराज महतले विकास निर्माण कार्यमा भइरहेको ढिलाइप्रति गम्भीर प्रश्न उठाएका छन्।
उनले आफ्नो सामाजिक सञ्जाल फेसबुकमार्फत एक स्टाटस सार्वजनिक गर्दै चार महिना बितिसक्दा पनि सम्बन्धित काम सुरु नभएकोप्रति असन्तुष्टि व्यक्त गरेका हुन्। “प्रयोगविहीन बन्दै छ, चार महिना बित्यो, काम अझै सुरु भएको छैन,” भन्ने अभिव्यक्तिमार्फत उनले जिम्मेवार निकायको ध्यानाकर्षण गराएका छन्।
विशेषतः उनले पछिल्लो समय मृत्यु पश्चात् आधुनिक मिसिनमार्फत लास दाहसंस्कार गर्ने प्रविधि व्यापक रूपमा प्रयोगमा आइरहेको सन्दर्भ जोड्दै हेटौंडा उपमहानगरपालिका अन्तर्गत राप्ती नदी किनारमा निर्माण गरिएको आधुनिक शवदाह स्थल प्रयोगविहीन बनेको विषय उठाएका छन्। यस्तो अत्याधुनिक पूर्वाधार निर्माण भइसकेपछि पनि सञ्चालनमा नआउनुले योजना कार्यान्वयनमा गम्भीर कमजोरी रहेको उनको संकेत छ।
महतले काममा ढिलाइ हुनुको कारणबारे प्रश्न उठाउँदै दक्ष जनशक्ति अभाव, आवश्यक सामग्रीको कमी वा निर्णय गर्ने इच्छाशक्तिको अभावमध्ये कुन कारण हो भन्ने स्पष्ट पार्न माग गरेका छन्। उनले आजको ग्लोबलाइजेशनको समयमा आवश्यक जनशक्ति र सामग्री उपलब्ध गराउन यति धेरै ढिलाइ हुनु अस्वाभाविक रहेको बताएका छन्।
उनका अनुसार, यस्तो महत्त्वपूर्ण पूर्वाधार लामो समयसम्म प्रयोगविहीन रहनु केवल प्रशासनिक ढिलासुस्तीको संकेत मात्र नभई जनताको आवश्यकताप्रति बेवास्ता पनि हो। “जनताले सोधिरहेका छन्— काम कहिले हुन्छ?” भन्ने प्रश्नमार्फत उनले जनभावना समेत उजागर गरेका छन्।
उनको उक्त स्टाटसपछि सामाजिक सञ्जालमा विभिन्न प्रतिक्रिया आउन थालेका छन् भने सम्बन्धित निकायमाथि चाँडो निर्णय गरी काम अघि बढाउन दबाब बढ्ने देखिएको छ।
