हेटौंडा, अशोज ६ गते । हेटौंडा-१९, दारिमटार स्थित महेन्द्र राजमार्गको सडक खण्डमा बस, ट्रक र ट्यांकर एक आपसमा ठोकिएर दुर्घटना भएको छ । दुर्घटना पश्चात् गम्भीर घाइते भएका सवारी चालक र यात्रुहरुलाई हेटौंडा अस्पताल लगिएको छ ।
हेटौंडाबाट चितवनतर्फ जाँदै गरेको ना ६ ख ८१८० नम्बरको ट्रक विपरीत दिशा चितवनबाट हेटौंडा तर्फ आउँदै गरेको ना ६ ख २११९ नम्बरको बस एक आपसमा ठोक्किएर दुर्घटना भए पछि सोही ट्रक टायर पड्किएर अनियंत्रित भइ चितवनबाट हेटौंडा तर्फ आउँदै गरेको ना ७ ख १७७४ नम्बरको ट्यांकरसँग ठोक्किएको हो ।
विपरीत दिशाबाट आएका उक्त गाडीहरू एक आपसमा ठोक्किँदा बस र ट्रकको अगाडिको भाग सबै कुच्चिएको छ भने ट्यांकरको चालक बस्ने साइडको भाग कुच्चिएको छ । बसमा सवार एक यात्रुका भनाइअनुसार चितवनबाट हेटौंडा तर्फ आउँदै गरेको बसको गति धेरै भएको र बेलाबेलामा गति कम गराउन सह चालकलाई अनुरोध समेत गरेको भन्ने छ ।
दुर्घटना पश्चात् गम्भीर घाइते भएका सवारी चालक र यात्रुहरुलाई हेटौंडा अस्पताल लगिएको प्रहरीले बताएका छन् । मानवीय क्षती केकती भयो भन्ने विषयमा अनुसन्धान भैरहेको प्रहरीले बताएका छन् ।
