काठमाडौँ, फागुन ६ गते । नेत्रहीन युवा संघ नेपालका देशभर रहेका १० वटा शाखाहरूमध्ये ‘फन्डेड फर यूथ लिडरसिप’ परियोजनाका लागि छनोट भएका तीन जिल्लामा नेतृत्व विकास कार्यक्रमले तीव्रता पाएको छ। काठमाडौँ, झापा र चितवन शाखालाई लक्षित गरी सञ्चालित यस विशेष परियोजना अन्तर्गत अहिले काठमाडौँमा तीन दिने प्रशिक्षण सुरु भएको छ।
नेत्रहीन युवा संघ नेपाल, उपत्यका शाखाको आयोजनामा सुरु भएको यस कार्यक्रमले अपाङ्गता भएका युवाहरूलाई राज्यको नीति निर्माण र कार्यान्वयनको तहमा पुर्याउँदै आफ्ना हक र अधिकारका लागि आफैँ आवाज उठाउन सक्षम बनाउने दीर्घकालीन लक्ष्य राखेको छ। यस प्रशिक्षणमा विभिन्न प्रकृतिका अपाङ्गता भएका १९ जना युवाहरूको सक्रिय सहभागिता रहेको छ। सहभागीहरूमध्ये १० जना दृष्टिसम्बन्धी, ४ जना शारीरिक र ५ जना स्वर तथा बोलाइ सम्बन्धी अपाङ्गता भएका युवाहरू रहेका छन्।
कार्यक्रममा स्वागत मन्तव्य राख्दै नेत्रहीन युवा संघ नेपालका केन्द्रीय कोषाध्यक्ष सुनील मानसिंहले आफूहरू वर्गीय अपाङ्गताको प्रतिनिधित्व गर्दै आएको उल्लेख गर्दै सहभागीहरूलाई आफ्नो अवस्था र हक अधिकार प्राप्तिका लागि गर्नुपर्ने पहलहरूबारे प्रष्ट पारे। उनले अपाङ्गता भएका व्यक्तिहरू केवल सामाजिक सेवाका पात्र मात्र नभई अब आफ्नो अधिकारका लागि निर्णायक नेतृत्वकर्ता बन्नुपर्नेमा जोड दिए।
यस परियोजना अन्तर्गत चितवन शाखामा कार्यक्रम सम्पन्न भई युवाहरूले समुदायमा काम सुरु गरिसकेका छन्। झापामा यो प्रक्रिया अगाडि बढिरहँदा काठमाडौँमा पनि प्रशिक्षण सुरु भएको हो। तालिम सकिएपछि सहभागीहरूले एउटा ठोस कार्ययोजना बनाउनेछन् र सोही आधारमा आगामी ९ देखि १० महिनासम्म आआफ्नो क्षेत्रमा अधिकार प्राप्तिको नेतृत्वदायी भूमिका निर्वाह गर्नेछन्। आयोजकले सहभागीहरूमा देखिएको अहिलेको जोस र उत्साहलाई कार्यक्षेत्रमा पनि निरन्तरता दिने अपेक्षा राखेको छ।
अपाङ्गता भएका युवाहरूलाई आफ्नो हक र अधिकारका लागि नेतृत्व लिन सक्षम बनाई उनीहरूलाई स्थानीय तथा राष्ट्रिय तहका योजना तर्जुमा प्रक्रियामा अर्थपूर्ण रूपमा सहभागी गराउनु नै यस ‘फन्डेड फर यूथ लिडरसिप’ परियोजनाको मुख्य उद्देश्य रहेको आयोजक संस्थाका निर्देशक निर श्रेष्ठले बताए।
