हेटौँडा, फागुन २१ गते । नेपाल पत्रकार महासंघ बागमती प्रदेश समितिका अध्यक्ष कृष्ण सारु मगरले प्रतिनिधिसभा सदस्य निर्वाचन अन्तर्गत मकवानपुरको दुर्गम क्षेत्रमा पुगे मतदान गरेका छन्।
अध्यक्ष मगरले मकवानपुर निर्वाचन क्षेत्र नम्बर २ अन्तर्गत कैलाश गाउँपालिका वडा नं. २ स्थित कमलादेवी माध्यमिक विद्यालय मतदान केन्द्रबाट मतदान गरेको हो। सोही केन्द्रबाट ८६ वर्षीय सन्त बहादुर प्रज्ञाले समेत मतदान गर्दै पहिलो मतदाताका रूपमा सहभागिता जनाए।
सदरमुकाम हेटौंडाबाट करिब पाँच घण्टाको मोटर यात्रापछि पुगिने यो मतदान केन्द्र जिल्लाकै दुर्गम तथा बिकट क्षेत्रमा पर्दछ। मतदानपछि प्रतिक्रिया दिँदै अध्यक्ष मगरले लोकतन्त्रको सुदृढीकरणका लागि हरेक नागरिकले अनिवार्य रूपमा मताधिकार प्रयोग गर्नुपर्ने बताए। उनले भने, “आफ्नो प्रतिनिधि आफैँ छान्ने यो ऐतिहासिक अवसर हो। भौगोलिक विकटताका बाबजुद यहाँका मतदातामा देखिएको उत्साह साँच्चिकै प्रशंसनीय छ। सबैलाई निर्धक्क भएर मतदान प्रक्रियामा सहभागी हुन आग्रह गर्दछु।”
निर्वाचन अधिकृत गोविन्द अधिकारीका अनुसार यस मतदान केन्द्रमा कुल ५३८ जना मतदाता रहेका छन्। चेपाङ समुदायसहित तामाङ, मगर, गुरुङ, क्षेत्री तथा दलित समुदायको बसोबास रहेको यस क्षेत्रमा बिहानैदेखि मतदाताको उल्लेख्य उपस्थिति देखिएको छ।
कैलाश गाउँपालिकासहित मकवानपुरका १० वटै स्थानीय तहमा आज बिहानैदेखि शान्तिपूर्ण र उत्साहजनक रूपमा मतदान भइरहेको निर्वाचन प्रशासनले जनाएको छ।
मकवानपुर निर्वाचन क्षेत्र नम्बर २ मा नेपाली काङ्ग्रेसबाट बुद्ध लामा, नेकपा एमालेबाट महेश बर्तौला, नेपाली कम्युनिस्ट पार्टीबाट लवशेर विष्ट, रास्वपाबाट प्रसान्त उप्रेतीसहित २१ जना उम्मेदवार चुनावी प्रतिस्पर्धामा रहेका छन्।
