हेटौंडा, फागुन २९ गते । शिवम सिमेन्ट उद्योगबाट हुने धुलो–धुवाँ नियन्त्रणको माग गर्दै स्थानीय बासिन्दाले पुनः आन्दोलनको चेतावनी दिएका छन्। सेवा सहयोग र आवाजका अध्यक्ष तथा सामाजिक अभियान्ता विशालराज महतले सामाजिक सञ्जाल फेसबुक मार्फत उद्योग र जन-प्रतिनिधिप्रति असन्तुष्टि जनाउँदै अब आन्दोलनको तयारीमा रहेको बताएका हुन्।
महतका अनुसार पटक–पटक खबरदारी गरिएपछि शिवम सिमेन्टका प्रतिनिधिसँग दुई पटकसम्म स्पष्ट छलफल भएको थियो। सो छलफलमा उद्योगका प्रतिनिधि, स्थानीय पीडित बासिन्दा, जनप्रतिनिधि तथा पत्रकारहरूको उपस्थितिमा धुलो–धुवाँ नियन्त्रणका विषयमा समाधान खोज्ने सहमति भएको थियो।
तर उद्योगका तर्फबाट निरन्तर आलटाल मात्र भएको आरोप महतले लगाएका छन्। उद्योगले प्रभावकारी कदम नचालेपछि स्थानीय बासिन्दाको उपस्थितिमा आन्दोलनको घोषणा गरिएको उनले उल्लेख गरेका छन्।
त्यसपछि बागमती प्रदेशका मुख्यमन्त्रीको ध्यानाकर्षण भएपछि उनकै रोहवरमा पुनः छलफल भएको थियो। सो बैठकमा स्थानीय सरकार तथा वडा कार्यालयको रोहवरमा ७ सदस्यीय समिति गठन गरी वार्ता, अनुगमन तथा आवश्यक सल्लाह दिने सहमति भएको थियो।
तर विडम्बना, हालसम्म उक्त समिति गठन भएको जानकारी स्थानीयलाई प्राप्त नभएको महतको भनाइ छ। उनले वडा अध्यक्ष उद्धव सत्याललाई पटक–पटक फोन गरेर समिति गठन गर्न आग्रह गरे पनि हालसम्म कुनै सम्पर्क वा पहल नभएको बताएका छन्।
स्थानीयको मत लिएर निर्वाचित जनप्रतिनिधि यस विषयमा मौन बसेको भन्दै महतले आश्चर्य व्यक्त गरेका छन्। उनले “हुन्छ भन्ने तर काम नगर्ने प्रवृत्तिले स्थानीयको विश्वासमाथि खेलवाड गरेको” आरोप लगाएका छन्।
महतका अनुसार यति लामो समयसम्म एउटा समिति समेत गठन हुन नसक्नु गम्भीर विषय भएको बताउँदै अब स्थानीय चुप लागेर नबस्ने र आन्दोलनको तयारीमा रहेको जनाएका छन्।
“शिवमको शक्ति बलियो कि हाम्रो आवाज, यसको उत्तर अब समयले दिनेछ,” उनले सामाजिक सञ्जालमार्फत चेतावनी दिएका छन्।
