हेटौडा, पुस २४ गते । शिवम् सिमेन्ट उद्योगबाट निस्कने धुलो–धुवाँका कारण नजिकैको विद्यालयमा अध्ययनरत बालबालिका तथा विशेष गरी लक्ष्मिपुर क्षेत्रका बासिन्दाहरूको स्वास्थ्यमा प्रत्यक्ष असर परेको भन्दै सेवा सहयोग र आवाजमा हामीका अध्यक्ष तथा सामाजिक अभियान्ता विशाल राज महतले निरन्तर आवाज उठाउँदै आएको जनाएको छ।
महतले सामाजिक सञ्जालमार्फत जानकारी गराउँदै यस विषयमा स्वास्थ्य मन्त्रालयमा समेत ध्यानाकर्षण गराइसकिएको उल्लेख गरेका छन्। सम्बन्धित उद्योग, मुख्यमन्त्री तथा अन्य मन्त्रालयमा जानुअघि नै शिवम् सिमेन्टका प्रतिनिधिहरू समस्या समाधानका लागि छलफल गर्न आफ्नै कार्यालयमा आएको उनले बताएका छन्।
छलफलका क्रममा केही दिनभित्र निर्णय गर्न सक्ने माथिल्लो तहका प्रतिनिधि, स्थानीय पीडित, जनप्रतिनिधि तथा पत्रकारको उपस्थितिमा औपचारिक छलफल आयोजना गरी उठाइएका मागहरूको लिखित रूपमा सम्बोधन गर्ने निष्कर्ष निकालिएको छ।
यद्यपि, यदि विषयलाई अल्झाउने वा टार्ने प्रयास भएमा सम्बन्धित मन्त्रालयमा थप ध्यानाकर्षण गराउनुका साथै धर्ना बस्न बाध्य हुने कुरा पनि शिवम् सिमेन्टका प्रतिनिधिलाई स्पष्ट रूपमा जानकारी गराइएको अध्यक्ष महतले बताएका छन्। समस्या समाधान नभएसम्म आफ्नो प्रयास निरन्तर रहने समेत उनले स्पष्ट पारेका छन्।
