हेटौँडा, फागुन २४ गते । हेटौंडा उपमहानगरपालिका वडा नम्बर १८ स्थित स्वास्थ्य चौकीमा रहेको एम्बुलेन्स आवश्यक अनुमति नपाउँदा लामो समयदेखि सञ्चालनमा आउन नसकेको पाइएको छ। बिरामीलाई अस्पताल लैजान अत्यावश्यक साधन भए पनि प्रशासनिक प्रक्रियामा फाइल अल्झिँदा एम्बुलेन्स प्रयोगविहीन अवस्थामा रहेको स्थानीयले बताएका छन्।
स्थानीयका अनुसार एम्बुलेन्स सञ्चालनका लागि आवश्यक कागजी प्रक्रिया जनस्वास्थ्य कार्यालयसम्म पुगेको भए पनि अन्तिम स्वीकृतिको फाइल महिनौँदेखि सम्बन्धित निकायको टेबलमै थन्किएको छ। यसका कारण एम्बुलेन्स प्रयोगमा आउन नसकेको र बिरामीहरू समयमै अस्पताल पुर्याउन समस्या भइरहेको गुनासो गरिएको छ।
स्वास्थ्य चौकीमा एम्बुलेन्स तयार अवस्थामा भए पनि प्रशासनिक अनुमति नपाउँदा सञ्चालन हुन नसक्दा स्थानीय बासिन्दा आक्रोशित भएका छन्। बिरामीको ज्यान जोगाउन प्रयोग हुनुपर्ने एम्बुलेन्स प्रशासनिक प्रक्रियामा अल्झिँदा सेवा प्रभावित भएको उनीहरूको भनाइ छ।
यस विषयमा चासो व्यक्त गर्दै सामाजिक अभियन्ता तथा सेवा सहयोग र आवाजका अध्यक्ष विशालराज महतले सामाजिक सञ्जाल फेसबुकमार्फत ध्यानाकर्षण गराएका छन्। उनले एम्बुलेन्स सञ्चालनका लागि सबै प्रक्रिया पूरा भएको बताइए पनि फाइल महिनौँदेखि अगाडि नबढेको भन्दै प्रश्न उठाएका छन्।
उनले एम्बुलेन्स सडकमा गुडेर बिरामीको सेवा गर्नुपर्ने अवस्थामा प्रशासनिक चक्करमै थन्किएको भन्दै सम्बन्धित निकायलाई शीघ्र समस्या समाधान गर्न आग्रह गरेका छन्। साथै वास्तविक अवस्था बुझ्न नागरिकस्तरबाट पत्रकारहरूसहित सम्बन्धित निकायमा पुग्ने तयारीसमेत गरिएको उनले बताएका छन्।
स्थानीयवासीले भने एम्बुलेन्स सञ्चालनमा ल्याएर स्वास्थ्य सेवा सहज बनाउन सम्बन्धित निकायले तत्काल आवश्यक निर्णय लिनुपर्ने माग गरेका छन्।
