हेटौंडा,जेठ १८ गते। विश्व वातावरण दिवस–२०८३ को अवसरमा सञ्चालन गरिएको सप्ताहव्यापी कार्यक्रम अन्तर्गत हेटौंडा–८ मा ‘फोहोर खोज चुनौती कार्यक्रम’ सम्पन्न भएको छ। कार्यक्रममा १९ वटा टोल विकास संस्थाका ३८ समूहले सहभागिता जनाउँदै २ हजार २ सय केजी अजैविक फोहोर संकलन गरेका छन्।
हेटौंडा उपमहानगरपालिकाको सहयोग, टोल विकास संस्था नगर समन्वय समितिको आयोजनामा तथा टोल विकास संस्था वडा समन्वय समिति हेटौंडा–८ को व्यवस्थापनमा कार्यक्रम सञ्चालन गरिएको हो। सहभागी समूहहरूले आफ्नो टोल तथा आसपासका क्षेत्रबाट प्लास्टिकजन्य तथा अन्य अजैविक फोहोर संकलन गरी व्यवस्थापनका लागि हस्तान्तरण गरेका थिए।
टोल विकास संस्था नगर समन्वय समितिका अध्यक्ष ध्रुवप्रसाद अधिकारीको अध्यक्षतामा सम्पन्न कार्यक्रममा प्रदेशसभा सदस्य एकलाल श्रेष्ठ प्रमुख अतिथि रहेका थिए। कार्यक्रममा हेटौंडा–८ का वडा सदस्य गोरख राय, नगर समन्वय समितिका सचिव तथा कार्यक्रम संयोजक शुशिला मल्ल, वडा समन्वय समितिका अध्यक्ष कुमार केसी लगायत अतिथिहरूको उपस्थिति रहेको थियो।
कार्यक्रमलाई सम्बोधन गर्दै प्रमुख अतिथि श्रेष्ठले वातावरण संरक्षणका लागि समुदायस्तरमा सञ्चालन हुने यस्ता अभियानले नागरिकमा जिम्मेवारीबोध बढाउने र स्वच्छ समाज निर्माणमा महत्वपूर्ण योगदान पुर्याउने बताए। वातावरण संरक्षणलाई व्यवहारमा उतार्न स्थानीय तह, समुदाय र नागरिकबीच सहकार्य आवश्यक रहेको उनको भनाइ थियो।
कार्यक्रमका अध्यक्ष अधिकारीले प्लास्टिकजन्य तथा अन्य अजैविक फोहोरको उचित व्यवस्थापन आजको आवश्यकता भएको उल्लेख गर्दै स्वच्छ, हरियाली र प्लास्टिकमुक्त हेटौंडा निर्माणका लागि टोलस्तरबाट अभियानलाई निरन्तरता दिनुपर्ने बताए।
प्रतियोगिताको नतिजाअनुसार कालिका टोल विकास संस्था प्रथम, विकास टोल (समूह ‘ए’) द्वितीय तथा मनकामना टोल (समूह ‘सी’) तृतीय भएका छन्। त्यसैगरी कालिका टोल (समूह ‘ए’), मनकामना टोल (समूह ‘बी’), बिन्दबासिनी टोल (समूह ‘ए’) र सृजना टोलले सान्त्वना स्थान प्राप्त गरेका छन्।
आयोजकका अनुसार प्रथम हुने समूहलाई १० हजार रुपैयाँ, द्वितीयलाई ७ हजार ५ सय रुपैयाँ, तृतीयलाई ५ हजार रुपैयाँ तथा सान्त्वना स्थान प्राप्त गर्ने प्रत्येक समूहलाई २ हजार ५ सय रुपैयाँ पुरस्कार प्रदान गरिनेछ। पुरस्कारहरू विश्व वातावरण दिवसका अवसरमा जेठ २२ गते आयोजना हुने विशेष समारोहमा वितरण गरिने कार्यक्रम रहेको छ।
कार्यक्रममा सहभागी टोल विकास संस्था, स्वयंसेवक तथा स्थानीयवासीहरूले वातावरण संरक्षण, फोहोर व्यवस्थापन तथा सरसफाइ अभियानलाई निरन्तरता दिने प्रतिबद्धता व्यक्त गरेका थिए। आयोजकले कार्यक्रमले समुदायस्तरमा वातावरणीय चेतना अभिवृद्धि गर्न महत्वपूर्ण योगदान पुर्याएको जनाएको छ।
