बगुवा,जेठ १७ गते। मकवानपुरको भीमफेदी गाउँपालिका–८ बगुवास्थित कान्तिलोकपथ सडकखण्डमा बागमती खोलामा खसेको टेलर गाडी निकालिएको छ। दुर्घटनामा बेपत्ता भएका चालकको शव गाडीभित्रै स्टेयरिङमा च्यापिएको अवस्थामा फेला परेको प्रहरीले जनाएको छ।
प्रहरीका अनुसार बागमती पुलसँग जोड्न निर्माण गरिएको डाइभर्सन सडकबाट ना ६ ख ४०४२ नम्बरको टेलर गाडी खोलामा खसेको थियो। दुर्घटनापछि चालक हेटौंडा उपमहानगरपालिका–३ निवासी ३० वर्षीय दलबहादुर बर्तौला बेपत्ता भएका थिए।
जिल्ला प्रहरी कार्यालय मकवानपुरका अनुसार उद्धार तथा खोजी कार्यका क्रममा खोलाबाट निकालिएको गाडीभित्र बर्तौलाको शव स्टेयरिङमा च्यापिएको अवस्थामा फेला परेको हो।
दुर्घटनाका बेला गाडीमा चालक र सहचालक गरी दुई जना सवार रहेका थिए। सहचालक १७ वर्षीय प्रशन्न प्रजा भने दुर्घटना हुनासाथ गाडीबाट हाम फालेर ज्यान जोगाउन सफल भएका थिए।
जिल्ला प्रहरी कार्यालय मकवानपुरका प्रहरी नायब उपरीक्षक (डीएसपी) माधव प्रसाद काफ्लेका अनुसार घटनाबारे थप अनुसन्धान भइरहेको छ।
