मोरङ। विराट चोक सडक खण्डअन्तर्गत सुन्दरहरैँचा नगरपालिका –१ स्थित हरैँचा बजारमा टिपरको ठक्करबाट मोटरसाइकल चालकको मृत्यु भएको छ ।
टिपरको ठक्करबाट सुनसरी दुहबी –९ का ४० वर्षीय महमद हमिद मियाँको घटनास्थलमै मृत्यु भएको मोरङ प्रहरीका प्रवक्ता डीएसपी वेदप्रकाश जोशीले जानकारी दिए ।
विराट चोकबाट दक्षिणतर्फ आउँदै गरेको ना १ क ६२७० नम्बरको टिपर दक्षिणबाट उत्तरतर्फ जाँदै गरेको प्रदेश १ ०२–०५३ प ७०१० नम्बरको मोटरसाइकललाई ठक्कर दिँदा दुर्घटना भएको प्रहरीले जनाएको छ ।
टिपरबाट मृत्यु भएका मियाँको शव स्थानीयले उठाउन दिएका छैनन् भने स्थिति तनावग्रस्त रहेको डीएसपी जोशीले बताए ।
टिपर चालकलाई नियन्त्रणमा लिइसकेको र घटनाको थप अनुसन्धान अघि बढाएको प्रहरीले जनाएको छ ।
प्रतिकृया दिनुहोस्
