हेटौँडा, कात्तिक २६ गते । नेपाल कम्युनिस्ट पार्टी (नेकपा) का केन्द्रीय सदस्य तथा मकवानपुर इन्चार्ज रामसीले सामाजिक सञ्जालमार्फत प्रधानमन्त्री शुशिला कार्की नेतृत्वको सरकारप्रति तीव्र आलोचना गरेका छन्। उनले हालको सरकार जेन जि आन्दोलनको जगमा बनेको भए पनि सोही आन्दोलनका युवा र समर्थकमाथि “एकतर्फी मुद्दा र दमन” चलाइएको आरोप लगाएका हुन्।
रामसीले आफ्नो स्टाटसमा लेखेका छन्, “लुटपाट र हत्याका घटना बाहेक आक्रोशमा गरिएको आगजनी र तोडफोडलाई बिद्रोहको हिस्सा मानिनु पर्छ, अपराध होइन। सरकारको अहिलेको कदम राजनीतिक समस्यालाई कानुनी बाटो देखाएर अन्याय गर्न खोज्नु हो।”
उनले घटनामा यथार्थ दोषी राज्य पक्ष र तत्कालीन नेतृत्वमाथि छानबिनको माग गर्दै तत्कालीन प्रधानमन्त्री केपी शर्मा ओली, गृहमन्त्री रमेश लेखक, तथा बिद्रोह पक्षका बालेन शाह, सुदन गुरुङ र मिरज ढुंगानालगायतलाई छानबिन र कारबाहीको दायरामा ल्याउन आग्रह गरेका छन्।
रामसीका अनुसार, “राज्यपक्षका दोषीहरू खुल्याम चुनौती दिइरहेका बेला जेन जि युवाहरू र समर्थकमाथि देशभर मुद्दा चलाउनु समाजिक र राजनीतिक चुनौती हो।”
उनले राजनीतिक समस्याको समाधान कानुनी कारबाहीबाट होइन, संवाद र सहमतिको बाटोबाट खोजिनुपर्ने उल्लेख गर्दै सरकारलाई सचेत बन्न आग्रह गरेका छन्।
रामसीले अन्त्यमा भनेका छन्, “दन्द स्वाभाविक हो, तर यसको व्यवस्थापन गर्नुपर्छ। सरकार र नागरिक दुबै सचेत बनौं।”
