हेटौडा, मंसिर १० गते । नेकपा (एमाले) को ११औँ महाधिवेशन मंसिर २७–२९ गते काठमाडौँमा हुने तयारीसँगै स्थानीय तहका नेताहरूले पनि प्रतिनिधि चयन प्रक्रियामा सक्रियता बढाएका छन्। हेटौडा उपमहानगरपालिका–४ का वडाध्यक्ष नवीन सिग्देलले मकवानपुर क्षेत्र नं. १ बाट खुला तर्फ महाधिवेशन प्रतिनिधिका लागि आफ्नो उम्मेदवारी दर्ता गराएका छन्।
जिल्ला पार्टी कार्यालय, हेटौँडामा उम्मेदवारी दर्ता गरेका सिग्देलले सामाजिक सञ्जालमार्फत पार्टी सदस्यहरूलाई प्रतिनिधि छनोटसहित सबै प्रक्रियामा सक्रिय भूमिका निर्वाह गर्न आग्रह गरेका छन्। उनले पार्टी एकता, नीति तथा नेतृत्व निर्माणमा महाधिवेशनको महत्वपूर्ण भूमिका रहने उल्लेख गर्दै सबैको सहयोग र साथको अपेक्षा व्यक्त गरेका छन्।
एमालेको ११औँ महाधिवेशनमा देशभरका प्रतिनिधि सहभागी हुने छन्। सिग्देलले मंसिर १० गतेको मितिमा आफ्नो उम्मेदवारी सार्वजनिक गरेका हुन्।
