हेटौंडा, पुस ६ गते । जेन–जी अगुवाहरूको सर्वसम्मत निर्णयअनुसार मिराज ढुङ्गानालाई जेन–जी नेताका रूपमा स्वीकृत गर्दै देशव्यापी संयोजक तोकिएको विषय सर्वविदित रहेको संस्थापक जेन–जी मकवानपुरले स्पष्ट पारेको छ। सोही निर्णयअनुरूप मिराज ढुङ्गानालाई संस्थापक जेन–जीका रूपमा स्वीकार गरिएकोमा कुनै दुई मत नरहेको पनि जनाइएको छ।
उक्त निर्णयअनुसार मकवानपुर जिल्लामा संस्थापक जेन–जी जिल्ला कमिटी संयोजक सुबिन खत्रीको संयोजनमा गठन भई विभिन्न सामाजिक तथा समसामयिक विषयमा आफ्ना धारणा सार्वजनिक गर्दै समाज रूपान्तरणमा सक्रिय भूमिका निर्वाह गर्दै आएको जानकारी गराइएको छ।
यसैबीच मकवानपुरमा जेन–जीको नाम दुरुपयोग गर्दै केही व्यक्ति तथा समूहले सामाजिक सञ्जालमार्फत अनधिकृत विज्ञप्ति जारी गरी भ्रम फैलाइरहेकोप्रति संस्थापक जेन–जी मकवानपुरको गम्भीर ध्यानाकर्षण भएको छ। यस्ता गतिविधिले समाजलाई गुमराह गर्ने भएकाले त्यसप्रति सजग रहन सबैमा आग्रह गरिएको छ।
आधिकारिक जेन–जीको तर्फबाट देशव्यापी संयोजक मिराज ढुङ्गानाको आह्वानमा सञ्चालन हुन गइरहेको शान्तिपूर्ण आन्दोलनमा मकवानपुरबाट पनि ऐक्यबद्धता जनाउँदै देशलाई निकास दिने दिशातर्फ उन्मुख यस अभियानमा सहभागी हुन सबैलाई तयारी अवस्थामा रहन अनुरोध गरिएको छ। शान्तिपूर्ण आन्दोलनसम्बन्धी थप जानकारी समयमै सार्वजनिक गरिने संस्थापक जेन–जी मकवानपुरले जनाएको छ।
भ्रमबाट बाहिर निस्केर सत्य र आधिकारिक धारसँग उभिन आग्रह गर्दै सरकारले गर्ने गतिविधि तथा केन्द्रीय जेन–जीको निर्णयअनुरूप नै अगाडि बढ्ने पनि स्पष्ट गरिएको छ।
