समाचार

कपिलवस्तु, भदौ २६ गते । विजयनगर गाउँपालिकामा तोडफोड र आगजनीमा संलग्न १६ जना व्यक्तिलाई प्रहरीले पक्राउ गरेको छ। बुधबार गाउँपालिका अध्यक्ष गोपालबहादुर थापाको कुर्सी र केही कागजात बाहिर निकालेर जलाउँदै गर्दा इलाका प्रहरी कार्यालय गणेशपुरबाट गएको प्रहरी टोलीले उनीहरूलाई नियन्त्रणमा लिएको हो। पक्राउ परेकामध्ये विजयनगर गाउँपालिका–७ का २१ वर्षीय विक्कु चौधरी, २८ वर्षीय विवेक चौधरी, ६० वर्षीय राजेन्द्र यादव, २१ वर्षीय लबुकस पाल र १८ वर्षीय महेन्द्र गिरी रहेका छन्। त्यस्तै, वडा नम्बर ७ लालपुरका २२ वर्षीय मुखलेस चौधरी, १६ वर्षीय मोनु पासी, २१ वर्षीय सुरेश कुर्मी, १९ वर्षीय जितेन्द्र चौधरी, २८ वर्षीय अभिषेक कुर्मी, २८ वर्षीय गोविन्द चौधरी र…

काठमाडौं, भदौ २६ गते । हालको सुरक्षा अवस्थाको विशेष विश्लेषणपछि राजधानी काठमाडौं उपत्यकाका तीनै जिल्लामा निषेधाज्ञा र कर्फ्यू आदेश जारी गरिएको छ। नेपाली सेनाको जनसम्पर्क तथा सूचना निर्देशनालय, जङ्गी अड्डाले एक विज्ञप्ति जारी गर्दै नागरिकको सुरक्षालाई मध्यनजर गर्दै यस्तो निर्णय गरिएको जानकारी दिएको हो। विज्ञप्तिअनुसार, भदौ २७ गते बिहान ११ बजेदेखि साँझ ५ बजेसम्म निषेधाज्ञा लागु हुनेछ। त्यसपछि, त्यही दिन साँझ ७ बजेदेखि भदौ २८ गते बिहान ६ बजेसम्म कर्फ्यू आदेश लागु गरिने उल्लेख गरिएको छ। साथै, अत्यावश्यक कार्यका लागि बिहान ६ बजेदेखि ११ बजेसम्म र साँझ ५ बजेदेखि ७ बजेसम्म मात्र आवतजावत गर्न सकिने व्यवस्था गरिएको छ। सुरक्षाको दृष्टिकोणले…

काठमाडौं, भदौ २६ गते । देशभर चलिरहेको GenZ Nepal आन्दोलन को नेतृत्वप्रति प्रश्न उठ्न थालेको छ। आन्दोलनको प्रारम्भकर्ता युवाहरूको आवाज अझै जनतासम्म पुग्न नसकेको तर पुराना नेताहरूका आफन्त तथा नातेदारहरूले आफूलाई GenZ नेताका रूपमा प्रस्तुत गर्दै भित्री चलखेल गरिरहेको आरोप लागेको छ। आन्दोलनको सुरुवात गर्ने मूल युवाहरूले भने आफूहरूको माग र विचारलाई प्रचार–प्रसारमा पाखा लगाइँदै आएको बताएका छन्। उनीहरूका अनुसार स्वतन्त्र पत्रकारहरूले समेत अन्तर्वार्ता वा प्रत्यक्ष धारणा लिन चासो नदेखाउँदा वास्तविक नेतृत्वको आवाज ओझेलमा पर्न पुगेको छ। “हाम्रो सानो प्रयासलाई सफल बनाउन र जनतासम्म साँचो आवाज पुर्‍याउन सबैको सहयोग र साथ आवश्यक छ,” उनीहरूले अपिल गरेका छन्। उनीहरू आशावादी छन्…

बारा, कलैया, भदौ २६ गते । जिल्लाको शान्ति सुरक्षा र अमन चयन कायम गर्न बारा जिल्लामा कर्फ्यु आदेश जारी गरिएको छ। प्रमुख जिल्ला अधिकारी प्रकाश पौडेलले मिति २०८२ साल भदौ २६ गते साँझ ८ बजेदेखि भदौ २७ गते बिहान ६ बजेसम्मका लागि कर्फ्यु आदेश लागू गरिएको जानकारी दिएका छन्। हालको विषम परिस्थितिको अनुचित फाइदा उठाउँदै सार्वजनिक सम्पत्ति नोक्सान गर्ने, लुटपाट तथा आगजनी गर्ने, हिंसात्मक आक्रमणजस्ता गतिविधि हुन नदिन स्थानीय प्रशासन ऐन २०२८ को दफा ६ (क) र (ख) बमोजिम आदेश जारी गरिएको हो। कर्फ्यु अवधिमा कसैले पनि आउजाउ, भेला, जुलुस, प्रदर्शन, सभा, बैठक तथा घेराउ गर्न पाउने छैनन्। तर अत्यावश्यक…

काठमाडौँ, भदौ २६ गते । सर्वोच्च अदालतले हालै भदौ २३ र २४ गतेका घटनामा ज्यान गुमाएका नेपाली नागरिकप्रति गहिरो दुःख व्यक्त गर्दै शोकसन्तप्त परिवारप्रति हार्दिक समवेदना प्रकट गरेको छ। साथै घाइतेहरूलाई शीघ्र स्वास्थ्य लाभको कामना समेत गरेको सर्वोच्चले न्यायिक संरचनामाथि भएको आगजनि, ढुंगामुढा, तोडफोड र लुटपाटका घटनाप्रति गहिरो चिन्ता र दुःख प्रकट गरेको छ। सर्वोच्च अदालतसहित देशभरका अदालत भवनमा भएको क्षतिको कारण नेपालका न्यायिक इतिहासका महत्त्वपूर्ण दस्तावेजहरू करिब नष्ट हुन पुगेको उल्लेख गर्दै सर्वोच्चले नागरिकहरूको सम्पत्ति जोगाउन खटिएका न्यायाधीश, कर्मचारी, कानुन व्यवसायी, कानुन विद्यार्थी, सुरक्षाकर्मी तथा सर्वसाधारणलाई आभार प्रकट गरेको छ। अदालतका अनुसार विषम परिस्थितिमा पनि संविधानले दिएको दायित्व निर्वाह…

गढी,बैतडी, भदौ २६ गते । जिल्ला प्रशासन कार्यालय गढी बैतडीले देशभर लागू गरिएको सुरक्षा व्यवस्थासम्बन्धी नेपाली सेनाको सार्वजनिक अपिलअनुसार जिल्लामा पनि निषेधाज्ञा र कर्फ्यु आदेश जारी गरेको छ। प्रशासनले जानकारी दिएको अनुसार आज भाद्र २६ गते बेलुकी ५ बजेदेखि भोलि बिहान ७ बजेसम्म निषेधाज्ञा लागू हुनेछ। साथै, भाद्र २७ गते बिहान ६ बजेदेखि साँझ ६ बजेसम्म कर्फ्यु आदेश जारी हुनेछ। प्रशासनले परिस्थितिको विश्लेषणको आधारमा आवश्यकतानुसार थप सूचना सार्वजनिक गर्ने जनाएको छ। आम सर्वसाधारणलाई आदेशको पालना गर्न र सुरक्षामा सहयोग पुर्‍याउन आग्रह गरिएको छ।

काठमाडौं, भदौ २६ गते । हालै २०८२ साल भदौ २३ गतेपछि देशभर भएका प्रदर्शनका क्रममा नेपाल प्रहरीका विभिन्न कार्यालय, इकाइ तथा कारागार कार्यालयहरूमा तोडफोड र आगजनी भएको घटनापछि अनुसन्धानको क्रममा रहेका केही अभियुक्त र अदालतबाट सजाय भुक्तान गरिरहेका कैदी–बन्दीहरू कारागारबाट भागेका छन्। नेपाल प्रहरी प्रधान कार्यालय, प्रहरी महानिरीक्षक सचिवालय नक्सालले बिहीबार जारी गरेको प्रेस विज्ञप्तिमा ती अभियुक्त तथा कैदी–बन्दीहरूलाई सम्बन्धित जिल्ला प्रहरी कार्यालय, स्थानीय प्रहरी इकाइ वा अन्य सुरक्षा निकायको कार्यालयमा तत्काल सम्पर्कमा आउन आग्रह गरिएको छ। प्रहरीले घटनामा संलग्न व्यक्तिहरूले यथाशीघ्र आत्मसमर्पण गर्नुपर्नेमा जोड दिँदै कानूनी कारबाही प्रक्रियाबाट बच्न नसकिने स्पष्ट पारेको छ।

काठमाडौं, भदौ २६ गते । नेपाल पत्रकार महासंघले हाल जेनजी पुस्ताको आन्दोलनले उत्पन्न गरेको विषम परिस्थितिमा संयमित र संवेदनशील हुँदै मुलुकलाई सुरक्षित निकास दिन सबै सरोकारवालालाई अपिल गरेको छ। महासंघले प्रेस विज्ञप्ति जारी गर्दै हालसम्मको आन्दोलनमा २३ जनाले ज्यान गुमाएको र बालबालिका तथा सुरक्षाकर्मी सहित हजारौं घाइते भएकोप्रति दुःख व्यक्त गर्दै मृतकप्रति श्रद्धाञ्जली र घाइतेको स्वास्थ्य लाभको कामना गरेको छ। साथै आन्दोलनका क्रममा चार जना पत्रकार गोली लागि घाइते भएको र विभिन्न मिडिया हाउसमाथि आक्रमण तथा आगजनी हुनु दुःखद र आपत्तिजनक भएको भन्दै राज्यले उचित क्षतिपूर्ति दिनुपर्ने माग गरेको छ। विज्ञप्तिमा आन्दोलनका नाममा सिंहदरवार, संसद भवन, सर्वोच्च अदालत लगायतका सार्वजनिक…

काठमाडौं, भदौ २६ गते । हालै भदौ २३ र २५ गते भएका प्रदर्शनका क्रममा नेपाल प्रहरीसहित अन्य सुरक्षा निकायका हातहतियार, सञ्चार उपकरण, सवारीसाधन, असबाब तथा विभिन्न भौतिक साधनहरू प्रदर्शनकारीको नियन्त्रणमा परेको वा कतै फेला परेको भए फिर्ता बुझाउन प्रहरीले अनुरोध गरेको छ। नेपाल प्रहरी प्रधान कार्यालय, नक्सालबाट जारी विज्ञप्तिअनुसार यस्तो सामग्री फेला परेमा नजिकको प्रहरी वा सुरक्षा निकायको कार्यालय, जिल्ला प्रहरी कार्यालय, प्रहरी कन्ट्रोल १००, टोल फ्री नम्बर १६६००१४१५१६ वा नेपाल प्रहरी प्रधान कार्यालयको सम्पर्क नम्बर ९८५१२९३४५९ मा सम्पर्क गर्न सकिनेछ। त्यस्तै आन्दोलनका क्रममा प्रदर्शनकारीहरूले नियन्त्रणमा लिएका प्रहरीको पोशाक दुरुपयोग नगर्न तथा सो सम्बन्धी सूचना पनि उपलब्ध गराउन प्रहरीको अनुरोध…