राजमार्ग खबर

चितवन, कार्तिक १५ गते । भरतपुर महानगरपालिका–९ टिकौली जंगलमा गएराति करिब पौने २ बजे भएको भीषण सवारी दुर्घटनामा ३३ जना घाइते भएका छन्। गौर र जनकपुरबाट काठमाडौँतर्फ जाँदै गरेका दुई यात्रुबाहक बस (डल्फिन र रुद्राक्ष) इँटा बोकेको ट्रकमा ठोक्किँदा दुर्घटना भएको हो। चितवन जिल्ला प्रहरीका अनुसार घाइतेमध्ये ८ जनाको अवस्था मध्यम गम्भीर रहेको छ। उनीहरूलाई तत्काल उद्धार गरी चितवन मेडिकल कलेज, नेशनल सिटी अस्पताल र भरतपुर सरकारी अस्पतालमा उपचारका लागि पठाइएको छ। दुर्घटनामा परेका घाइतेहरू धनुषा, रौतहट, महोत्तरी, उदयपुर तथा भारतका विभिन्न स्थानका रहेका छन्। दुर्घटनापछि नेपाल प्रहरी, सशस्त्र प्रहरी र स्थानीय बासिन्दाहरूले रातभर उद्धार कार्यमा खटिएर घाइतेहरूलाई अस्पताल पुर्‍याएका…

चितवन, कार्तिक १४ गते । चितवन जिल्लाको भरतपुर महानगरपालिका–९ अन्तर्गत टिकौली जंगलमा भएको सवारी दुर्घटनामा घाइते भएका यात्रुहरूको सशस्त्र प्रहरी बल, नेपाल नं. १७ गण चितवनको टोलीले तत्काल उद्धार गरी उपचारका लागि अस्पताल पठाएको छ। सशस्त्र प्रहरीका अनुसार दुर्घटनाको जानकारी प्राप्त हुनासाथ टोली घटनास्थल पुगेको थियो। टोलीले घाइतेहरूलाई प्राथमिक उपचारपछि नजिकैको अस्पतालमा पुर्‍याएको जनाएको छ। दुर्घटनापछि केही समय रोकिएको सवारी आवागमन उद्धार कार्य सम्पन्न भएपछि पुनः सुचारु गरिएको सशस्त्र प्रहरीले जनाएको छ। दुर्घटनाको कारण भने अहिलेसम्म खुलाइएको छैन। घटनाबारे थप अनुसन्धान भइरहेको बताइएको छ।

रामेछाप, कात्तिक १२ गते । रामेछापको हलेदे–खिम्ती सडकखण्डमा आज दिउँसो एक माइक्रोबस दुर्घटनामा परेको छ। प्रदेश नम्बर १–०२–००१ज ४४३८ नम्बरको सो माइक्रोबस रिजर्भ यात्रामा रहेको बेला विपरित दिशाबाट आइरहेको सुमोलाई साइड दिने क्रममा सडकबाट अनियन्त्रित भई दुर्घटना भएको हो। दुर्घटनामा मानवीय क्षति नभएको प्रारम्भिक जानकारी प्राप्त भएको छ।

ताप्लेजुङ, अशोज २२ गते । ताप्लेजुङको बहनन्दे नजिकै मेचि राजमार्गमा आज मे १त ६२६९ नम्बरको ट्याक्टर दुर्घटना भएको छ। दुर्घटनामा चालक सामान्य घाइते भएका छन्। दुर्घटनाको कारण खुलेको छैन। प्रारम्भिक अनुसन्धानका क्रममा प्राविधिक समस्या वा सडक अवस्था कारण हुन सक्ने अनुमान गरिएको छ। घटनाको थप अनुसन्धान भइरहेको प्रहरीले जानकारी दिएको छ।

चितवन, अशोज १३ गते । दशैं–तिहार मनाउन काठमाडौँदेखि पूर्व–पश्चिमतर्फ गइरहेका यात्रु पुनः बिचल्लीमा परेका छन्। नारायणघाट–मुग्लिन सडकखण्डअन्तर्गत तुइनखोलामा फेरि पहिरो खसेपछि दुईतर्फी सवारी आवागमन अवरुद्ध भएको हो। यसअघि केही दिनअघि सोही स्थानमा पहिरो खसेको थियो। निरन्तर प्रयासपछि दुई दिनमा सडक खोलिँदै सवारी साधन नियमित सञ्चालनमा आएको थियो। तर, पुनः त्यही स्थानमा पहिरो खसेपछि यात्रुले कठिनाइ भोग्नु परेको छ। यातायात अवरुद्ध हुँदा घर फर्किँदै गरेका यात्रु सडकमा अलपत्र परेका छन्। प्रहरीले सडक सुचारु गर्ने प्रयास भइरहेको जनाए पनि कहिलेसम्म सडक खुल्ने भन्नेबारे निश्चित जानकारी भने आएको छैन।

खोटाङ, अशोज १३ गते । खोटाङको हलेसी तुवाचुङ नगरपालिका–१० अर्खौलेस्थित बिजुलेमा सोमबार बिहान सुमो दुर्घटना हुँदा १३ जना घाइते भएका छन्। प्रारम्भिक जानकारीअनुसार दुर्घटनामा ७ जना मध्यम र ६ जना सामान्य घाइते भएका हुन्। घाइतेहरूलाई नजिकैको स्वास्थ्य संस्थामा उपचारका लागि लगिएको छ। दुर्घटनाको विस्तृत विवरण र कारण खुल्न बाँकी रहेको प्रहरी स्रोतले जनाएको छ।

उदयपुर, अशोज १२ गते । उदयपुरको बेलका नगरपालिका–४ मा काठमाडौंबाट विराटनगरतर्फ जाँदै गरेको एउटा इभी (EV) सडकबाट करिब १० मिटर तल खस्दा दुर्घटना भएको छ। दुर्घटनापछि गाडीमा सवार सबै यात्रु सकुशल रहेका छन् र मानवीय क्षति भएको छैन। स्थानीयका अनुसार चालकले रातभरि निरन्तर गाडी चलाइरहेको र निदाएको कारण दुर्घटना भएको अनुमान गरिएको छ। यस सम्बन्धमा थप अनुसन्धान भइरहेको प्रहरीले जनाएको छ।